الأول

التاج ده جالي من سنووي حبيبتي

بس أنا أول ماقريت عشر حاجات أكتبها عن نفسي لفت نظري اني ماعرفش حاجات كتير اوي عن نفسي هبتدي أكتب يمكن يوصلوا لعشرة مين عارف

Post 10 random things about yourself

1) أنا فتاة مسلمة مصرية مجنونة:)،متناقضة ،حساسة للغاية،عصبية للغاية ،مزاجية جدا ممكن أكون مبسوطة جدا ولو حصل حاجة تنرفزني تقلب يومي كله ، والعكس صحيح ممكن بعد فترة احباط طويلة بأحاول أخرج نفسي منها وأرجع لانطلاقي مرة أخرى

2) جريئة ونشيطة وطموحة بابا مسميني الدينامو في ناس تانية بتقول عني القطر ماعلينا المهم أنا أحلامي الكتير هي سبب همي في معظم الوقت انشغالي بكيفية تحقيقها بتنسيني الاستمتاع

3) كليتي جنتي وناري لوحد سألني من ست سنين كنت قلت نار يا حبيبي نار،لكن دلوقتي يجمع بين الاتنين رغم ان الاعلام كان ولازال حلمي الأول والطب كان غصب عني الااني سبحان الله دلوقتي مش ندمانه عليه اطلاقا بل بالعكس أتمنى إني أكون دكتورةعظيمة مش لازم مشهورة لكن أحقق تغيير وأساعد الناس،وفي الوقت نفسه بأحلم وباسعى إني أكون أديبة وصحفية مشهورة وناجحة،في حلم مجنون إني أرشح نفسي في يوم من الأيام في مجلس الشعب وابقي"نايبة" واجيب للناس حقوقها

4) مستمعه جيدة ، بانشغل بالناس أكتر مابنشغل بنفسي بتاثر لو حد بحبه ممكن اقعد فترة متضايقة لضيقه وحتى لوحد ماعرفوش باتضايق جدا من السلبيات اللي حولي بالذات لوأثرت على شخص ضعيف زي الأطفال بقيت أكره أمشي في الشارع اوالمستشفى عندنا بقيت حاسة ان االناس ماشية مهمومه حزينة عايزة اللي يطبطب عليها ويقولها وأنا كمان

5) حاجات بحبها: بأحب السفر والورود وأي شئ له علاقة بالخضرة والطبيعة ،بأحب الانطلاق بأحب الزحمة ورغم ده بحب ساعات الهدوءوالسكينه رغم اني مش هادية اطلاقا "في ناس مغشوشة في وبتقول عني رزينة" لكني باحب فعلا الهدوء بس مش الصمت القاتل طبعا، باحب الفجر وبأحب وقت العصر والشمس بتودع،باحب الشتا والمطر، عندي هواية لجمع الذكريات يعني من كل مكان وكل شخص قابلته في عندي سوفينير، آه وبحب الحيوانات جدااااخاصة القطط، نفسي أفتح محل كبير أقسمها خمس أجزاء مكتبه جميلةوهادية بمكان الناس تقعد فيه وتشرب قهوة وشاي وكاكاو وجنبه محل ورود ومحل لف هدايا وأبيع آيس كريم عشان الأطفال ينجذبوا للقراءة، بأحب التاريخ كان نفسي زمان أدرس آثار وأتعلم لغات

6) أكره الزيف والكذب والنفاااااق والندالة والصوت العالي "أناصوتي عالي جداوبتكلم بسرعه رهيببةJ" لكن انا بتكلم عن الصوت العالي يعني حد يزعق ،اللي في قلبي على وشي ولساني مش بقولكم قطر وصريحة جدا وعاقلة جدا أحيانا وأعيل من أي طفل معظم الوقت، لان الحاجات اللي ذكرتها رغم اننا كلنا بنعملها كتير الا انها كفيلة انها تنزل الشخص اللي قدامي من نظري لاني لوفقدت احترامي لشخص يبقى فقدت حبي ليه، لأني فعلا بحب أتعامل مع شخصية محترمة الاحترام اهم حاجة في اي علاقة بين البشر لانه بيبتني عليه كل شئ بعد كده

7) ودودة جدا وصاحبة صاحبي لكن لمابقلب ياساتر ماليش حبيب:) ، لكن عندي مقدرة على الاحتفاظ بالصداقات لفترة طويلة للغاية عندي من ايام المدرسة يمكن ماخسرتش غير صديقة واحده طول عمري...بأحب صديقاتي جدا زي أخواتي وبأحب اللمة والناس والحفلات والأفكار الجنونية والمرح، بحب جدا جدا أفاجئ اللي حولي رغم ان لساني بيفلت في آخرلحظة كالعاده وأدايه ببقى سعيدة لمابشوف الابتسامة مرسومة عل شفاه من أحب والله بتبقى الكلمة الحلوة والابتسامة أجمل هدية

8) بأحب كل حاجة عريقة وأصيلة سواء كان في أسلوب الحياة ،البيوت ،الشوارع،الموسيقى،الأدب والفنون،الملابس ساعات كتير أتمنى إني كنت أعيش في عصر اليشمك والطربيش من حيث الشكل وليس المضمون طبعا التطور مطلوب

9) فيروز بتحكي قصة حياتي،بدون مبالغة فيروز لازمتني من اعدادي لحد دلوقتي باحس انها غنت لي :أكيد لأ" بس أنا حرة ، القراءة والكتابة حياتي ممكن حد يحطني في صحراء ويسيب معايا خمس حاجات كاسيت فيه أغاني فيروز،ورقة ،قلم،ورود ومياه عشان أرويها.

10) الفراق بأخاف منه جدا،دايما بأفكر فيه لدرجة انه بيعكنن علي في أجمل لحظاتي لأني دايما بأفكر إن مافيش شئ بيدوم وبخاف جدا من الموت بأخاف لما أقابل ربنا أقوله ايه حاسة اني لسه ماعملتش كل اللي علي،مش بخاف من الفشل لكن بخاف إني ماحاولش أنجح،مابخافش من الناس ولا رأيهم في أوفي تصرفاتي لكن على النقيض تماما بيهمني رأي الناس وباخاف من نقدهم لكن بس الناس اللي بحبهم
11) نسيت أقولكم أنا رغاية جدا جدا وبأخترع من الكلمة جمل ومواضيع ماتنتهيش وماليش ريموت ايقاف عشان كده أضفت رقم11 :))

أخترت أبعت التاج ده للمدونات التالية

غراب وحمامة

يمامة شاردة

عمو

Leave them each a comment directing them to your blog so they know they are it
اوك
You can’t tag the person who tagged you (you’ll have to make new friends)
As a courtesy to the person who tagged you, please let them know when you have posted so they can have the sheer delight and extra work load of reading your answers)

شكرا يا سنووي على التاج

أنتي طبعا عارفة أكتر من اللي قلته وبجد أسعدتيني للغاية