أنا من البــلد دي

أنا من البلد دي، بلد ابويا وجد جدي، بلد أخويا وولادي بعدي

كانت هذه الأغنية تذاع في إذاعة القاهرة، استمع إليها الأستاذ ناصح ذكي فهيم، كان يتمنى لو دندن مع هذه الأغنية، واستغرب كثيرا كون سائق ميكروباص قد أدار مثل هذه المحطة فكان يتوقع أن تتكرر ماساة كل صباح مع سائقي الميكروباص و أغانيهم الشعبية، هو لايكره مثل هذا النوع من الأغاني فقد كان في شبابه من أكثر المحبين لمحمد عدوية ، لكن مع الألفية الثالثة وظهور شعبوللا وسعد الصغير و و و إيــييييه ، أصبحت العشرون دقيقة ما بين منزله إلى عمله رحلة عذاب سمعية وفكرية ناهيك عن الزحمة والتصاق الركاب بعضهم ببعض،

فليس لدى السائق أي مشكلة كون العربة لا تحتمل سوى اثنتا عشر راكباً بالمقاعد الخلفية لكن في سبيل نصف جنيه مستعد أن يؤجره لنقل الحيوانات أيضاً.

أزاح عن رأسه تلك الأفكار فاليوم لازال في أوله ، ولايريد ان يعكر صفوه قبل أوانه، رائحة السجائر "كح كح كح" اصابته منها سعلة شديدة رغم أنه ليس لديه حساسية تجاهها لكن لربما كانت جراء عقاب والده إياه عندما عثر عليه يدخن ، ومنذ ذلك اليوم لايطيق رائحتها، تمنى كثيراً لو شارك أصدقائه في جلسات السمر واحدة أو اثنتان لكن كالعادة لا يستطيع أ/ناصح أن يختار شيئاً يرغب فيه كثيراً بدءً من اسمه ، الذي بدلاً ان يكون فخراً له فهو مكون من ثلاثة اسماء، اكتشف بعد ذلك أنها ثلاثة أسماء للسخرية
"أنت ناصح أنت؟ اسمك بالكامل ايه يا سي ناصح؟

ناصح ذكي فهيم

كمان؟؟؟هههههه"
تعالت اصوات كل من الفصل بالضحك، فهكذا طوال الأربعين سنة كان اسمه مصدر لسخرية الجميع
فكر يوماً عندما أنجب ابنه البكر أن يسميه"فطين" استكمالا للانتقام العائلي من الأجيال القادمة ، لكنه اشفق عليه من أن يواجه نفس المصير واختار له اسماً لا يجرؤ احد على السخرية منه "أحمد".

بلد ابويا وجد جدي،أنا من البلد دي

تحرير تحرير، يفتح باب الميكروباص على مصراعيه ، وفي سباق ماراثوني ينافس تلك في الأولومبيات، قفز الجميع إلى الداخل على الرغم من أنه لايوجد سوى مقعداً واحداً شاغر،تمكن اثنان من الصعود واضطر الباقي أن يدور في "التراك" انتظارا" للعربة القادمة
اتفضل هنا
لا والله لا تتفضل أنت
لا مايصحش ده كلام اتفضل انت انا هقعد هنا
لا انت شايل حاجات كتيرة عشان تعرف تقعد براحتك
نقاش وجدال استمر لأكثر من نصف الدقيقة ولكنها مرت على أ/ناصح كدهر
كلاهما يصر على أن يجلس أحدهما إلى جوار الأستاذ ناصح بينما يجلس الآخر متطوعاً على ساقيه؟؟!!!!
نعم فالمكان الآخر المتبقي كان مسند خلف السائق وملامس إلى ساقي أ/ناصح
يارب عدي اليوم ده على خير
قالها ا/ناصح محدثاً نفسه محاولا كظم غيظه،ممنياً نفسه باقتراب محطته
وأخيراً اذعن أحد الراكبين لطلب الآخر وجلس قرب ساقي ا/ناصح.

معلش ممكن شوية؟؟
شوية ايه؟؟؟؟
توسع شوية مش عارف اقعد
وانا اعملك ايه انت مش شايف الدنيا زحمة ازاي ، حاول تستحمل شوية لحد مانوصل
وهكذا تغير ذلك الراكب 180 درجة من الذوق اللامتناهي وصاحبه إلى انانية وقلة ذوق مع ا/ناصح الذي استسلم في ضيق إلى هذا الراكب الطفيلي.

شفت الدولار نزل ازاي؟
ياعم دولار ايه هي الناس لاقية تاكل
طيب شفت العيش؟؟؟
لا بقالي كتير ماشفتوش
ياعم بجد شفت بقى عامل ازاي
اه أنا الواد ابني دخلت عليهم امبارح بأربع ترغفة، قعد يهلل ويقول بابا جاب لنا عيش كيزر

ضحك أ/ناصح رغماً عنه، وتذكر المشاجرة الصباحية وزوجته بسبب طلبات الشهر
ناصح ماتنساش تجيب معاك الحاجات اللي كبتبهالك في الورقة
ربنا يسهل
يعني ايه؟؟؟
يعني ربنا يسهل
يعني هتجيبها ولا لأ
أنا قلت ايوا ربنا يسهل ، ايه اللي مش مفهوم في كده
لا اصلك بقالك يومين كده أحوالك مش عاجباني ،أقولك كيلو تجيبلي نص
أقولك نص تجيب لي ربع
خلاص ياستي اللى أجيب لك نصه احرميني منه بعد كده، واعتبريني كلته وأنا جاي
انت بتتريق؟؟
لا ازاي وأنا اقدر، من عيني حاضر هجيبهوملك وانا جاي

مين اللي مادفعش؟؟؟ الأجرة يا بيه
اتفضل
ايه ده ؟
جنيه
أهلا وسهلاً

فين الربع؟؟
للحظات، شك أ/ناصح أنه يحدث زوجته وأنها تنكرت في هيئة تباع الميكروباص وهي توبخه لشرائه نص كيلو جبنه اسطنمبولي بدلا من كيلو
هو مش الأجرة جنيه برده؟
لا جنيه وربع؟
اشمعنا؟؟
البنزين غلي

امتى؟؟

رد عليه التباع باستهزاء "امبارح العصر،أنت مش في الدنيا ؟؟
الظاهر لأ
اتفضل الربع ياسيدي،جت عليك يعني

هيزودوا المرتبات
بيقولوا فيه علاوة
أطرق ا/ناصج برأسه للخلف لينصت جيداً إلى حديثاً دار بين اثنين من الركاب
وياترى قد ايه
تكون زي ماتكون المهم ناخد منهم حاجة
مافيش حاجة لوجه الله ابداً
ياسيدي ايش ياخد الريح من البلاط
واخذ ا/ناصح يحلم بالعلاوة، ياترى قد ايه؟؟رمضان قرب
ياما انت كريم يارب
50% من المرتب الأساسي
يابلاش
لا بلاش احسن

بلد ابويا وجد جدي، بلد أخويا وولادي بعدي
وصلنا خلاص ، مين نازل هنا؟؟؟
انتظر ا/ناصح حتى نهض الراكب الذي تسلق ساقيه ، حاول النهوض لكن لم يكن يشعر بقدميه، وخز سرى فيهما عند حركته ثم مالبث أن تحسن
ماتياله يا استاذ
حاضر صبرك علي، انتوا مابقاش فيه صبر ابدا
يا مسهل
وأكمل ا/ناصح طريقه إلى المصلحة الحكومية التي يعمل بها
ولايوجد بذهنه سوى شئ واحد
أنا من البلد دي؟؟؟؟؟؟؟؟؟

منقول من مدونتي الجديدة أنا من البـلد دي