الثلاثاء، 25 مارس 2008

طويل العمر يطول عمره


وعاد عصر الطرابيش

والله كانوا ناس شيك، الواحد منهم يعدل الطربوش والزر لورا

أويميله على جنب"ده لو أفندي روش حبتين"
وشكله أوريجينال أحمر وشكله ظريف"لا سوري ده العنب"

طربوش القرن الحادي والعشرون مابقاش على الراس، بقى جواها

المفروض إن الناس تتقدم مش كده ولا إيـــه؟؟؟

إلا إحنا..ياريتنا حتى محلك سر...للأسف بنرجع لورا لحد ماقربنا على ثورة عرابي

وياخوفي أصحى في يوم الناس رجعت لعصر الفراعنه وبتقدم عيالها قرابين
يابيه؟؟؟؟ياباشا؟؟؟

لا لا ده مش مشهد من رد قلبي ولا الملك فاروق

ده مشهد في واحده من أعرق مستشفيات مصر ،الدمرداش

أنا بتكلم عن كليتي ماعرفش ايه النظام في القصر العيني

تلاقي النايب من دول يقول للدكتور الأستاذ ورئيس القسم يا بيه، تمام يابيه

مش لازم يقولها لرئيس القسم بس

المدرس يقولها للأستاذ المساعد

والأستاذ المساعد للأستاذ

والأستاذ لرئيس القسم

طبعاَ لازم نراعي الهرم الوظيفي فين أيامك ياخوفو حتى عجايب الدنيا حرموك منها

المهم خلينا في موضوعنا

لقب "طبيب" دُكتور اللي بنقعد ننام نحلم بيه وأهلنا يدفعوا دم قلبهم على الدروس الخصوصية؟؟؟

تفتكروا لييييه؟

أنا شايفة حد رافع ايده

أيوا أنت ماتتكسفش

عشان يتعلم ويعالج المرضى

ويحسن وضعهم الصحي ويخليهم يعيشوا حياة كريمة مش لازم فقر ومرض وبطالة

كفاية حاجتين بس مؤقتا

طبعا إجابة خاطئة للأسف وساذجة

خدعوك فقالوا

الاجابة الصحيحة: عشان في الآخر يكون وظيفته يركب أسلاك الكمبيوتر

ويدوس على الماوس ويقلب الصفحة والدكتور يقول نكست

اللي بيحضروا محاضرات هيفهموني

أنا مش تافهه عشان أمسك في سلبية واحده من السلبيات

وإيه يعني كلمة يا بيه دي تضايقني

المشكلة مش في البيه ولا الباشا

ياسيدي لو هو بيه أنا هانم

الفكرة إن ده رمز لاستعباد الطبيب المتخرج لأنه قليل الخبرة والتعليم

طيب هو المفروض إن دي غلطته

المفروض إنه اتخرج عشان يرضي غرور السينيور عليه

ولا أولوياته المفروض تكون إنه يعالج المرضى

مش لازم إني أحل مشاكل كل الناس

لو غيرت في حياة إنسان واحد ده في حد ذاته إنجاز

مش لازم نتملق عشان نوصل لأهدافنا

عرفتوا بقى إن الطربوش لسه ماتخلعش

هناك 13 تعليقًا:

سنووايت يقول...

طيب صحيح بيقولوا للدكاترة يا بيه اومال الدكتورات بيقولولهم ايه؟؟!!
عموما مسيري اعرف السر في اللقب دا

هبة المنصورة يقول...

باكره الألقاب دى أوى
واللى بيستخدمها بيقع من نظرى
مش عارفه مالها دكتور ف حالتكو؟
وليه الناس بتقول لسواق التاكسى والميكانيكى وبتاع الدش والتليفونات وعمال الصيانه عامة ياباشمهندز؟؟
وحتى لقب أستاذ وأستاذه اللى كان زمان بيستخدم للإشارة لحد محترم دلوقتى باحسه شتيمه

ربنا يستر علينا

الفارس الملثم يقول...

صح علي راي سنووايت الدكتورة بيقولولها ايه ..

عموما ماله عصر الباشوات علي الاقل وقتها الناس مكنتش بتقف في طابور العيش بالست ساعات

تقبلي مروري

الطائر الحزين يقول...

نفس المعنى تقريبا قلته فى تدوينة سايقة

http://sadbrd.blogspot.com/2007/11/blog-post.html


تحياتى

اسامة يس يقول...

اتفهم جدا ما ترمين اليه..
التنشئة على الرهاب منذ الصغر والنفاق ...
هو ببساطة لو ترك حرا لأبدع أو حتى استطاع ان يعمل عقله فيبتكر حلولاً ربما لم تطرأ لرئيسه الباشا والبيه..
لكنه مقيد بنظرة الباشا ورؤية البيه.. في عملية آلية كحضور وانصراف.. ليس فيها روح ..
التعليم طب وغير طب مجموعة من الحشويات يتخرج بعدها الطالب وهو لا يدري اكان قد استفاد شيئاً ام لا...
انها مسألة شكلية .. لابد من شهادة
الكبت وعدم اعمال العقل هو السبب
قد اكون حدت عن السياق قيلاً
عذرا ...
دمت بكل ود..
خالص تحياتي

د/اجدع بنوته يقول...

علشان تتعلمى لازم كدا

واكتر م كدا كمان

وهدايا

ويبعتوكى تجيببى عيش لو طلبت

وتروحى مع الولااد المدرسه

علشان ناظرتهم طلبت ولى امرهم

وقطعا السيد الدكتور مش فاضى ولا حرمه

ولو عندك عربيه قولى عليها السلامه

هيتطلب منك مشاوير بالعبيط

واهو كله ف سبيل العلم

هععععععععععع

asfour-elnar يقول...

فعلا الطربوش دلوقتي جوا الراس مش

فوقيها ....عشان كده البلد دي ماشيه

بضهرها

لحظة تأمل يقول...

الطربوش دلوقتى بقى فى كل حاجة
فى التعليم وجميع العلاقات اللى فيها رئيس ومرؤوس
وعشان كده مبقاش حد بيتعب نفسه فى التفكير او انه يعمل شئ جديد

مدونتك رقيقة

تحياتى وتقبلى مرورى

shorouk said شروق سعيد يقول...

إنتى قلتى جملة حعتبرها حكمة للتاريخ
"طربوش القرن الحادي والعشرون مابقاش على الراس، بقى جواها"

wanna b a physician يقول...

يا شهرزاد فى طب عين شمس عندنا يا بيه للتقديس يعنى ايام الفراعنة كدا لما كانوا بيروحوا المعبد لعمو الكاهن بتاع الفرعون كانوا بيقولوه يا بيه خد القربان ده وارضى انت عنى

يمامة شاردة يقول...

انتي بتتكلمي جد؟

كلية دي وللا بتنجان؟!!

اشمعنى احنا دكاترتنا كانوا محترمين؟

Unknown يقول...

فكرتينى بطربوش نعمان جمعة رئيس الوفد لما قال إنه عاوز يرجع الطربوش
قال يعنى مشاكل البلد خلصت ومعادش ناقصنا إلا الطربوش هو اللى هيحلها

"ما هى دى اللى موتته"
تحياتى مدونة جميلة
مستنى زيارتك وتعليقك

Blue Nile يقول...

فعلا كل المستشفى بتقول يا بيه
انا هخاف اروح البيت اقول لماما وبابا يا بيه